என் மின்மினிகள்

நிலவுக்கு ஒளியேற்ற

சூரியனை தேடிப்போனேன்

விண்மீன்களையும் அழைத்துக்கொண்டு.

வழி நெடுகிலும் கடைகள்

எல்லாம் சூரியன் விற்பவை.

முன்னும் பின்னுமோ

வாங்குவோர் கூட்டம்.

சிலரிடம் சூரியன் ஒருமையில்

சிலரிடமோ  அது பன்மையில்!

பின்னும்  ஏன்?

கவுரவத்தை உயர்த்திக்கொள்ளவாம்.

ஒருவாறு நுழைந்து விலை கேட்ட போது

உயிரையே விற்றாலும் முடியாத விலையுடன்

கண் சிமிட்டி சிரிக்கிறது சூரியன்!

புண்ணான கால்களுடன் வெளியேறி வந்தேன்

வழமையை விடவும் இருட்டு மண்டலம்

திரும்பி பார்க்கிறேன்

மூன்று சூரியன்கள் வாங்கியவனுடன்

எனக்கு முகம் திருப்பி போகின்றன ஏன் விண்மீன்கள்!